SON DƏQİQƏ

“Bu məsələ belə qalmamalıdır” - Rəsulzadənin barelyefinin oğurlanmasına sərt ETİRAZ

Tarix:15-01-2019, 18:25

Xəbər verdiyimiz kimi, Azərbaycanın görkəmli dövlət xadimi, Xalq Cümhuriyyətinin əsas liderlərindən biri Məhəmməd Əmin Rəsulzadənin Bakının Novxanı kəndində doğulub, boya-başa çatdığı evin qarşısındakı barelyefi oğurlanıb. Novxanı sakinlərinin Modern.az-ın əməkdaşına verdiyi məlumata görə, hadisə yanvarın 15-nə keçən gecə baş verib. Sakinlər səhər açılanda üzərində Rəsulzadənin şəkli olan mis lövhənin – barelyefin yerində olmadığını görüblər.


Modern.az-ın əməkdaşı hadisə ilə əlaqədar Məhəmməd Əmin Rəsulzadənin nəvəsi Rəis Rəsulzadə ilə əlaqə saxlayıb. O, hadisədən xəbərsiz olıduğunu bildirib:

"Mənim bununla bağlı heç bir məlumatım yoxdur. Hər halda mütləq araşdırmaq lazımdır. Üstəlik, Rəsulzadənin anadan olmasının 135-ci ilinə az qalmış belə hadisənin baş verməsi təəccüblüdür. Mən özüm də məlumat əldə etməyə çalışacağam”. 

Tarixçi-alim, Rəsulzadə irsinin və Cümhuriyyət tarixinin araşdırmaçısı Nəsiman Yaqublu da bu hadisəni pisləyib. Onun fikrincə, "Cümhuriyyət ili”nin yenicə yekunlaşdığı bir vaxtda Rəsulzadənin evinin önündəki lövhənin çıxarılması çox mənfi haldır:

"Düşünürəm ki, hakimiyyət orqanları bununla ciddi məşğul olmalıdır. Novxanı ərazisinə cavabdeh Abşeron Rayon İcra Hakimiyyəti birbaşa məsuliyyət daşıyır. Bu əməli hər kim törədibsə, aşkarlanmalı, məsuliyyətə cəlb edilməlidir. Mən özüm də mütləq bunu araşdırıb, məlumat əldə etməyə çalışacağam. Bu məsələ belə qalmamalıdır”.

 

Qeyd edək ki, Məhəmməd Əmin Rəsulzadənin vaxtilə yaşadığı həmin ev uzun müddətdir uşaq bağçası kimi fəaliyyət göstərir. 

Oğurlanmış mis barelyefin həmin yerə 1992-1993-cü illərdə vurulduğu bildirilir.

Xatırladaq ki, ötən illərdə bəzi tanınmış simalar dəfələrlə müvafiq qurumlar qarşısında Rəsulzadənin doğulub, boya-başa çatdığı həmin evin muzeyə çevrilməsi təşəbbüsü ilə çıxış ediblər.

скачать dle 10.6фильмы бесплатно

FACEBOOK ŞƏRH

SON XƏBƏRLƏR

ÖLKƏ İÇİ