www.DOGRU.tv - Onlayn Televiziya » Fakt » Uzunömürlü “ölü” süd məhsulları…


Uzunömürlü “ölü” süd məhsulları…

Bölmə: Fakt
Uzunömürlü “ölü” süd məhsulları…
Mütəxəssislər və dövlət qurumları onların keyfiyyəti haqda nə deyirlər?

Süd və süd məhsulları ən çox istehlak edilən məhsullardan sayılır. Bazar və mağazalarda müxtəlif çeşidlərdə süd və süd məhsulları satılır. Amma kəmiyyət çoxluğu bol olsa da, həmin məhsullardan hansının daha keyfiyyətli olğunu seçmək çətindir.
Azad İstehlakçılar Birliyinin sədri Eyyub Hüseynov bildirib ki, tez xarab olmaması üçün istehsalçılar tərəfindən süd və süd məhsullarına əlavə qatqılar vurulur: “Əgər yerli və ya xaricdən gətirilən xama, qaymaq və digər süd məhsullarının yararlılıq müddəti üç aydan çoxdursa, bu, tərkibinə çoxlu kimyəvi maddələr vurulan "ölü" məhsul deməkdir. Həmin kimyəvi maddələr südün tərkibindəki canlı bakteriyaları öldürdüyü kimi, insan bədəninə düşəndə də bağırsaqlarda olan mikrofloranı məhv edir. Təəssüf ki, ölkəmizdəki süd məhsullarında belə hallar mövcuddur”.

E.Hüseynovun sözlərinə görə, süd məhsulları otaq temperaturunda üç gündən sonra qıcqırmalı, göbələkləşməli, kif bağlamalıdır: “Bu da çox təbii haldır, yəni məhsulun təbii süddən hazırlandığını bildirir. Lakin Azərbaycanda istehsal olunan süd məhsullarının 60%-i quru süddən hazırlanır. Ölkədəki quru süd biznesi isə fermer təsərrüfatlarının boğazını kəsən bıçaqdır. Çünki Bakıdan 120 km məsafədə təbiətin möcüzəsi olan südün bir litrini 20 qəpiyə sata bilmirlər, baxmayaraq ki, suyun bir litri ondan 20 dəfə bahadır. Bunun əsas səbəbi də ölkəyə xaricdən idxal olunan quru süd məhsullarıdır. Onların mənşəyi isə məlum deyil, bəzən vaxtı keçmiş olur".

İqtisadiyyat və Sənaye Nazirliyinin mətbuat xidmətindən isə bildirilib ki, ötən il Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən istehlak bazarında aparılmış yoxlamalar zamanı yararlılıq müddəti ötmüş, normativ texniki sənədlərin tələblərinə cavab verməyən 3873,4 kq süd məhsulları satışdan çıxarılaraq məhv edilib: “Süd və süd məhsulları alarkən diqqətli olmaq vacibdir. Çünki saxlanılma şəraitinin və müddətinin pozulması süd məhsullarında bakteriyaların inkişafını sürətləndirir və bu sağlamlığınız üçün təhlükəlidir. Qablaşdırılan süd məhsulları markalanmalı və üzərində istehsalçının adı və ünvanı, məhsulun adı, yağın kütlə payı, əmtəə nişanı, məhsulun xalis çəkisi, istifadə tarixi, tərkibi, istifadə edilməsi haqda məlumatlar, saxlanılma müddəti və şəraiti, standartın nömrəsi və digər məlumatlar yazılmalıdır. Süd məhsulları qablaşdırılmış paketlər zədəsiz olmalıdır. Bu məhsulların yararlılıq müddəti istehsalçı tərəfindən müəyyən olunur və məhsulun etiketində göstərilir”.

Nazirlikdən verilən məlumata görə, dövlət standartlarına edilən dəyişikliklər nəticəsində süd məhsullarından olan “Kəsmik”, “Ayran”, “Qatıq”, “Dovğa”nın istifadə müddəti uzadılıb. Belə ki, yeni standarta görə, +2+6 dərəcə temperaturda kəsmiyi 14 sutka, mənfi 18 dərəcədən yuxarı olmayan temperaturda isə 4 ayadək, ayranı 20, dovğa 14, qatığı 14 sutka müddətlərində saxlamaq olar: “Yararlıq müddətinin uzadılması istehsal texnologiyasının inkişafı, Avropanın qabaqcıl istehsal avadanlıqlarının Azərbaycana gətirilib quraşdırılması ilə bağlıdır. Bundan başqa, qablaşdırılmasında yüksək standartlara uyğun qablaşdırma materiallarından istifadə olunması nəticəsində bu məhsulların daha uzun müddət ərzində keyfiyyətli saxlanması təmin edilir. Saxlanma müddəti bitmiş süd məhsullarının istifadəsi sağlamlığınız üçün təhlükəlidir. Ona görə bu məhsulları alarkən diqqətli olmaq lazımdır”.

Səhiyyə Nazirliyinin Respublika Gigiyena və Epidemiologiya Mərkəzinin şöbə müdiri İmran Abdullayev bildirib ki, hazırda Bakı şəhəri və Abşeron rayonu üzrə süd məhsullarının monitorinqinə başlanıb. Fevralın 25-dək davam edəcək monitorinqlər zamanı süd məhsullarının laborator tədqiqatı aparılacaq. Onun sözlərinə görə, monitorinqlər zamanı 100-dək nümunə üzərində yoxlamanın aparılması planlaşdırılıb. Əvvəlki yoxlamalar zamanı bu sahədə hansı nöqsanların aşkarlanmasına gəlincə, İ.Abdullayev qeyd edib ki, süd və süd məhsullarının fiziki, kimyəvi və mikrobioloji göstəriciləri yoxlanılır: “Biz bu monitorinqləri mütəmadi həyata keçiririk. Amma demək olar ki, bu yoxlamalar zamanı elə də ciddi bir nöqsanlar aşkarlamamışıq”.

Standartlaşdırma, Metrologiya və Patent üzrə Dövlət Komitəsinin (SMPDK) mətbuat xidmətinin rəhbəri Fazil Talıblı da bildirib ki, süd və süd məhsulları tez xarab olan məhsullardandır və istehlakçısı çoxdur. Onun sözlərinə görə, Texniki Tənzimləmə və Standartlaşdırma üzrə Dövlət Nəzarəti Xidməti tərəfindən süd və süd məhsulları bazarında mütəmadi olaraq yoxlamalar aparılır: “Təssüf ki, yoxlamalar zamanı bəzi nöqsanlar aşkarlanır. Amma bu nöqsanlar süd məhsullarının keyfiyyəti ilə deyil, sertifikatsız məhsulların istehsalı və satışı ilə bağlı olur. Belə hallarda həmin istehsalçılara qarşı və həmin məhsulların bazardan çıxarılması ilə bağlı tədbirlər görülür”.